Բրազիլիայի նախագահ Միշել Թեմերը նորից հայտնել է, որ ինքը մտադիր չէ հրաժարական տալ կոռուպցիոն սկանդալի կապակցությամբ։

 Folha de S.Paulo թերթին տված հարցազրույցում Թեմերը ասել է, որ ինքն անմեղ է ու կմնա իր պաշտոնում մինչեւ 2018-ի դեկտեմբեր։ «Ես հրաժարական չեմ տա, եթե նրանք ուզում են, թող գահընկեց անեն ինձ, քանի որ եթե ես հեռանամ, դա կնշանակի ընդունել իմ մեղավորությունը»,- ասել է Թեմերը։

Երկրի գերագույն դատարանը որոշել է Թեմերի նկատմամն կոռուպցիայի մասին հետաքննություն սկսել։ Ավելի վաղ Globo-ի լրագրողները դատարանին ուղարկել են ձայնագրություն, ըստ որի Թեմերը հավանություն է տվել լռության դիմաց պատգամավորների պալատի նախկին ղեկավար Էդուարդ Կունյային կաշառք տալուն։ Կունյան Petrobras պետական նավթագազային ընկերությունում կոռուպցիայի մասին գործով վկա է։