Հնդկաստանի ՌՕՈւ-ի «Սու-30» կործանիչը ուսումնական թռիչքի ժամանակ երկրի հյուսիս-արեւելքում ռադարներից կորել է, «ՌԻԱ Նովոստի»-ի փոխանցմամբ՝ հայտնում են տեղական լրատվամիջոցները:
Hindustan Times-ի տեղեկություններով՝ կործանիչի հետ ռադիոկապն ընդհատվել է, երբ այն Չինաստանի սահմանից ոչ հեռու՝ Ասամ նահանգի Թեզփուր քաղաքից 60 կմ հյուսիս էր գտնվում: Ռազմական օդանավում են եղել 2 օդաչու, որոնք ավելի վաղ հայտնել են շարժիչի աշխատանքի ընդհատումների մասին:
«Ռադարներից կորելուց առաջ «Սուխոյ» մակնիշի օդանավն ուսումնական թռիչք էր կատարում Թեզփուրից ոչ հեռու: Օդանավում երկու օդաչու էր»,- ասել է Հնդկաստանի ՌՕՈւ-ի անհայտ մնացած բարձրաստիճան ներկայացուցիչը, որը հասկացրել է, որ օդանավը կարող էր կործանվել:
India Today պարբերականի տեղեկություններով՝ այն շրջանում, որտեղ հնդկական կործանիչն ուսումնական թռիչք է կատարել, եղանակային վատ պայմաններ են եղել:
Ներկայումս կատարվում է ծավալուն որոնողական գործողություն: