Հյուսիսային Կալիֆորնիայում՝ Կորդիլերների արեւմտյան գոտում, իրավապահ մարմինները հայտնաբերել են ոչ մեծ ինքնաթիռի բեկորներ։ Նրանք նաեւ գտել են ավելի քան մեկ ամիս առաջ անհետ կորած զույգի մարմինները, հաղորդում է Americaru-ն։
Սիերա շրջանի շերիֆը հայտարարել է, որ ինքնաթիռի պոչի բեկորը պատահաբար նկատել է ձյունագնացով այնտեղ հայտնված մարդը, հաղորդում է AP։ Դրանից հետո մասնագետները սկսել են որոնել զոհերին, եւ ձյան տակ՝ ավելի քան 2 մետր խորությամբ, հայտնաբերել Մարկ եւ Բրենդա Ռիչարդներին։ Մեկ շարժիչային ինքնաթիռը թռչել է Թրաքի Թահո օդանավակայանից՝ Նեւադայի հետ սահմանի մերձակայքում, ապրիլի 17-ին։
Ավիաաղետի պատճառը հայտնի չէ, սակայն ենթադրվում է, որ ինքնաթիռը բախվել է ծառին։ Ներկա պահին պատահարը հետաքննվում է։