Կոնգրեսի ներկայացուցիչների պալատի դեմոկրատները Deutsche Bank-ից պահանջել են տեղեկություններ՝ Ռուսաստանի հետ ԱՄՆ նախագահ Դոնալդ Թրամփի ենթադրյալ կապերի մասին, հայտնում է DW-ն։

«Կոնգրեսն անտեղյակ է, արդյոք Ռուսաստանի կառավարությունը երաշխիքներ է տրամադրել Deutsche Bank-ում Թրամփին տրամադրվող վարկերի համար, ու արդյոք այդ վարկերը որեւէ կերպ կապակցված են եղել Ռուսաստանի հետ»,- ասվում է Deutsche Bank-ի ղեկավար Ջոն Կրայանին ուղարկված նամակում։

Նամակում ասվում է, որ միայն Deutsche Bank-ի կողմից իրավիճակի պարզաբանումից հետո ԱՄՆ հասարակությունը կկարողանա գնահատել, թե որքանով է Թրամփը կապված Ռուսաստանի հետ ու արդյոք այդ կապերը ազդում են նախագահի քաղաքական որոշումների վրա։

Կոնգրեսականները նաեւ բանկի ղեկավարությանը խնդրել են տրամադրել տեղեկություններ այն անձանց մասին, որոնք օգուտ են քաղել փողերի լվացման գործարքից, որի մեջ ներառված է նաեւ Deutsche Bank-ը։ Deutsche Bank ռուսական մասնաճյուղի միջոցով լվացվել է 10 մլրդ դոլարին համարժեք գումար։

Deutsche Bank-ը հրաժարվել է մեկնաբանել այդ հաղորդագրությունը։ Բանկի բաժնետոմսերը 1․6 տոկոսով նվազել են կոնգրեսականների նամակի մասին տեղեկության հրապարակումից հետո։