Հայաստանում չկա ստվերային տնտեսություն առանց կառավարության մասնակցության, դասական ստվերային տնտեսությունը երկրում ընդամենը 10 տոկոս է կազմում։ Այս մասին Երեւանում մայիսի 25-ին Գործատուների միավորումների միջազգային համակարգող խորհրդի նիստի ընթացքում, ստվերային տնտեսության կրճատման մասին Բուլղարիայի փորձի քննարկումների ժամանակ, ասել է տնտեսագետ Վահագն Խաչատրյանը։
Նրա խոսքով Հայաստանում հիմնական խնդիրը մրցակցության բացակայությունն է, թե քաղաքական, թե տնտեսական։ Քաղաքականության ոլորտում գործում է ՀՀԿ-ի մենաշնորհը, որը Վահագն Խաչատրյանը «կոմունիստական կուսակցություն» է անվանում։ Նա նշել է, որ Հայաստանը այդպես էլ չի հաղթահարել սոցիալիզմի գաղափարախոսությունը, հակառակը, վերջին տարիներին այն վերականգնվել է։
Ինչ վերաբերում է տնտեսությանը, ապա Վահագն Խաչատրյանի խոսքով, այն զուտ մենաշնորհային -օլիգարխիական կառույց է։ «Առանց «դոբրո» ստանալու անհնար է բիզնես անել։ Նույնն էլ ներդրումներին է վերաբերում։ Գլխավորը ոչ թե օրենք է , այլ «կրիշան»։ Մրցակցություն որպես այդպիսին չկա ու դա է ամենագլխավոր խնդիրը, թե ինչու չի զարգանում բիզնեսը։ 2008-ին Հայաստանի ՀՆԱ-ն կազմում էր 11․6 մլրդ դոլար, իսկ հիմա 10․5 մլրդ է»,- ասել է նա։
Տնտեսագետի խոսքով ժողովրդագրական, գործազրկության ու աղքատության խնդիրները երկրում չեն լուծվում։ «Արտաքին պարտքը 2008-ին 1․2 մլրդ դոլար էր, հիմա՝ մոտ 6 մլրդ։ Չորս անգամ ավելացրել են բյուջեն, ՀՆԱ-ն չի աճում, գործազրկությունը նույն մակարդակի վրա է, աշխատանքի արտադրողականությունը մինչհեղափոխական մակարդակի վրա է։ Մասնավոր սեկտորը 90 տոկոսով վերահսկվում է մոնոպոլիստ օլիգարխների կողմից։ Դրա համար էլ մենք ընտրությունների ազատություն չունենք»,- ասել է նա՝ հավելելով, որ այս իրավիճակը կարելի է շտկել միայն շուկայական տնտեսության կանոններն ու օրենքները պահպանելով։
