Երեւան-Մոսկվա ուղեւորափոխադրում իրականացնող «Դը Ռոյալ Լիդեր» սահմանափակ պատասխանատվությամբ ընկերության տնօրենը այս տարվա մարտին վարչական տույժի է ենթարկվել նույն ավտոբուսի համար, որը նախօրեին վթարի էր երթակվել: Ինչպես NEWS.am-ը տեղեկանում է կառավարության կայքից, ՀՀ կապի, տրանսպորտի եւ տեղեկատվական տեխնոլոգիաների նախարարությունը «Վարչարարության հիմունքների եւ վարչական վարույթի մասին» ՀՀ օրենքի 59-րդ հոդվածի համաձայն, ՍՊԸ-ի տնօրեն Արամ Զատիկյանին տուգանել է 450 հազար դրամով, քանի որ պարզվել է, որ նշված ընկերությանը պատկանող «Մերսեդես» մակնիշի «618 AD 61» պետհամարանիշով տրանսպորտային միջոցով իրականացվել է միջպետական ոչ կանոնավոր փոխադրում Հայաստանից դեպի Ռուսաստանի Դաշնություն ՀՀ օրենքով սահմանված պահանջների խախտմամբ:
«Դը Ռոյալ Լիդեր» ՍՊԸ-ի տնօրենը տուգանվել է նույն այն ավտոբուսի համար, որը հունիսի 13-ին վթարի էր ենթարկվել:
Հիշեցնենք, որ հունիսի 13-ի առավոտյան Վորոնեժի մարզում Մոսկվա-Երեւան երթուղով ընթացող ավտոբուսը ջրատարն է ընկել: Ճանապարհային պատահարի հետեւանքով 3 մարդ տուժել է, այդ թվում՝ 2 երեխա: Միջին ծանրության մարմնական վնասվածքներ ստացած տուժողներին տեղափոխել են Բոգուչարի հիվանդանոց: Լուծվում է ավտոբուսի ուղեւորներին հյուրանոցում տեղավորելու հարցը՝ մինչեւ հաջորդ ավտոբուսի ժամանումը: