Պարտադիր չէ, որ ղարաբաղյան հակամարտության գոտում սպառազինության մրցավազքը ռազմական հակամարտության հանգեցնի: Այս մասին Երեւանում՝ NEWS.am-ի թղթակցի հետ զրույցում ասաց ՆԱՏՕ-ի գլխավոր քարտուղարի Հարավային Կովկասում եւ Կենտրոնական Ասիայում հատուկ ներկայացուցիչ Ջեյմս Ապաթուրայը:
Ի պատասխան հարցին՝ կարո՞ղ է սպառազինության մրցավազքը Ղարաբաղում լայնամասշտաբ պատերազմի հանգեցնել, նա նշեց. «Ես չգիտեմ, թե ինչ կպատահի: Պարտադիր չէ, որ սպառազինության մրցավազքը զինված հակամարտության հանգեցնի: Ի վերջո, մշտապես բոլորը որոշում են քաղաքական լուծումները: «Սառը պատերազմի» տարիներին Միացյալ Նահանգները եւ Ռուսաստանը նույնպես ահռելի քանակով սպառազինություն կուտակեցին, սակայն նրանք այդպես էլ միմյանց դեմ պատերազմ չսկսեցին»: Հետեւաբար, շարունակեց նա, հնարավոր է, որ զենքի քանակն ավելանա, բայց պատերազմ չի լինի:
«Սակայն երբ դրա հետ մեկտեղ շարունակվում են ցածր մակարդակի ռազմական բախումները, իսկ երբեմն՝ նաեւ ոչ ցածր մակարդակի, եւ կողմերը կիրառում են բավական մտահոգիչ քաղաքական հռետորաբանություն, ապա այդ դեպքում, իհարկե, սպառազինության մրցավազքը խնդրի մաս է դառնում»,- հավելեց Ջեյմս Ապաթուրայը: