Հունիսի 14-ին Երեւանում մեկնարկել է հայ-տաջիկական բիզնես համաժողովը, որին մասնակցում են մոտ 100 հայկական եւ 36 տաջիկական ընկերությունների ներկայացուցիչներ:
Իր ողջույնի խոսքում փոխվարչապետ, միջազգային տնտեսական ինտեգրման եւ բարեփոխումների նախարար Վաչե Գաբրիելյանը նշեց տեղեկատվական տեխնոլոգիաներում, դեղագործության, ոսկերչության մեջ, նաեւ տնտեսության այլ ճյուղերում երկրի լավ հնարավորությունները: «Երկրում գործում է մասնավոր ներդրումների պաշտպանության զարգացած օրենսդրություն»,- հավելեց նա:
Տաջիկստանի Ներդրումների եւ պետգույքի կառավարման պետական կոմիտեի նախագահ Ֆայզիդին Կահորզոդան, իր հերթին, նշեց, որ տաջիկական ընկերությունները կարող էին Հայաստանի թեթեւ արդյունաբերության համար բամբակի հումքի եւ փայլաթիթեղագլանման գործարանի համար առաջնային ալյումինի լավ մատակարար լինել: Նա հավելեց, որ Տաջիկստանում մի քանի ազատ տնտեսական գոտիներ են գործում, այդ թվում՝ Չինաստանից ոչ հեռու (Դանգարա): «Չինական շուկայում աշխատել ցանկացող հայ արտադրողների համար դրանք կարող են օգտակար լինել»,- նշեց Կահորզոդան: