ԵՏՄ պատվիրակությունն ու Իրանը ավարտել են աշխատանքները ժամանակավոր համաձայնագրի տեքստի վրա, որով ազատ առեւտրի գոտի է ձեւավորվելու։ Բանակցությունների հերթական փուլը կկայանա Թեհրանում հունիսի 13-14-ը։
Ժամանակավոր համաձայնագրի համաձայն՝ կողմերը հետեւելու են ԱՀԿ հիմնարար սկզբունքներին՝ ԵՏՄ-ի ու Իրանի միջեւ առեւտրի շրջանակներում բոլոր ապրանքների նկատմամբ ապահովել առավել բարենպաստ ռեժիմ ու ազգային ռեժիմ։ Համաձայնագրի համաձայնեցված նախագծում ամրագրված է, որ ապրանքների ներմուծման հետ կապված բոլոր գանձումները չպետք է գերազանցել մաքսային ձեւակերպման համար տրամադրված ծառայությունների արժեքը։ Այդ գանձումները չեն կարող լինել անուղղակի պաշտպանություն հայրենական ապրանքների համար կամ էլ ներմուծումից ու արտահանումից լրացուցիչ հարկեր գանձելու միջոց։ Նման պահանջը ամենակարեւորներից մեկն է ԱՀԿ իրավունքում ու ապահովում է երկրների միջեւ առեւտրի ռեժիմի կանխատեսելիությունը։
Մոտ ժամանակներս ԵՏՄ-ն ու Իրանը կշարունակեն բանակցել ապրանքների շուկայի մուտքի փոխադարձ ազատականացման շուրջ, կհամաձայնեցնեն նաեւ սակագնային պարտականությունները։
Ենթադրվում է, որ ժամանակավոր համաձայնագրի շրջանակում ներմուծման տուրքերը կնվազեցվեն ապրանքների նվազագույն քանակով՝ մինչեւ 200 ապրանքային դիրք երկու կողմերից։ Եթե ԵՏՄ երկրներն ու Իրանը արտոնյալ առեւտուրը արդյունավետ համարեն, հետագայում հնարավոր է անցում լիաձեւաչափ ազատ առեւտրի գոտու։ Ժամանակավոր համաձայնագիրը կնքվելու է երեք տարով։
ԵՏՄ պատվիրակության ղեկավար Վերոնիկա Նիկիշինայի խոսքով այն փաստը, որ Իրանը ,որը ԱՀԿ-ի անդամ չէ, ստանձնել է պարտավորություն այդ կազմակերպության պահանջների մակարդակի վրա հետեւել առեւտրի ռեժիմին, արդեն իսկ աննախադեպ է։ «Հատկապես արժեքավոր է, որ բանակցային գործընթացի հաջող ավարտի ու հաջող գործարկման դեպքում Իրանը նման ռեժիմի մասով պարտավորությունները կիրառելու է ամբողջ երկկողմանի առեւտրի նկատմամբ, այլ ոչ թե միայն այն ապրանքների, որոնց համար համաձայնեցված են արտոնյալ սակագներ։ ԵՏՄ բոլոր երկրները արդեն աշխատում են ԱՀԿ կանոններով, դրա համար էլ իրանցի գործընկերների կողմից դա միակողմանի զիջում է, որը ցույց է տալիս նրանց շահագրգռվածությունը մեր առեւտրային ռեժիմի ազատականացման հարցում»,- նշել է Վերոնիկա Նիկիշինան։
