Շատ ու շատ խնդիրներ շարունակում են մնալ արդիական, որովհետեւ կառավարությունն իր գործունեության նախորդ շրջանում չի հասցրել լուծել դրանք: Այս մասին հունիսի 21-ին՝ ԱԺ նիստում հայտարարեց ԱԺ «Ելք» խմբակցության պատգամավոր Արտակ Զեյնալյանը:
Բանախոսը մասնավորապես շեշտեց մենաշնորհների եւ գերակա դիրքի հետ կապված խնդիրները՝ հավելելով, որ նախորդ սխալներն ընդունելու դեպքում միայն հնարավոր կլինի նոր ծրագրի իրագործումը:
Անդրադառնալով գազի գնին՝ Զեյնալյանը այն կապեց ցեմենտի ներկրման հետ. «Լինելով 3 միլիոն տոննա ցեմենտ արտադրող երկիր, այս պահին Հայաստանում վաճառվում է օտարերկրյա ծագման ցեմենտ: Եվ վերացական չի, որ ասում եմ թուրքական ծագման ցեմենտի մասին: Եթե գազի գինը լինի այնքան, որքան որ մեզ առաջարկվել է Իրանի կողմից, ապա մենք կկարողանանք դա իրականացնել»,- ընդգծեց Զեյնալյանը եւ հավելեց, որ այս դեպքում բազմաթիվ ոլորտներ մրցունակ կդառնան, եւ ներքին շուկայում լրացուցիչ արգելքներ դնելով ներքին սպառողին պաշտպանելու կարիք չի լինի:
Համախառն ներքին արդյունքի հետ կապված՝ Զեյնալյանն ակնկալում է տեսնել հստակ կանխատեսում, թե յուրաքանչյուր շնչի հաշվարկով որքա՞ն է փոխվելու ՀՆԱ-ն, Հայաստանի բնակչության 47 տոկոսը դադարելո՞ւ է մտածել արտագաղթի մասին, եւ արդյոք դադարելո՞ւ ենք պատժված հասարակություն լինելուց: «340 հազարի չափով վարորդական իրավունք ունեցող անձանց պարագայում տարեկան տրվում է 2 միլիոն վարչական տուգանքի որոշում: Սա, կարծում եմ, կառավարությունը պետք է անպայման հաշվի առնի, որ մեր հասարակությունը դադարի լինելու պատժվածների հասարակություն»,- եզրափակեց ելույթը Զեյնալյանը:
