ՀՀ տնտեսական մրցակցության պաշտպանության պետական հանձնաժողովը բացահայտել է տասնյակ դեպքեր, երբ մի շարք ընկերություններ գնորդներին վաճառել են «Մայքրոսոֆթի» չարտոնագրված տարբերակները: Այս մասին այսօր՝ հունիսի 21-ին, Տնտեսական մրցակցության պաշտպանության պետական հանձնաժողովի եւ ՀՀ-ում ԱՄՆ-ի առեւտրի պալատի համատեղ կազմակերպված քննարկման ժամանակ նշել է ՏՄՊՊՀ նախագահ Արտակ Շաբոյանը:
Նա անդրադարձել է ամերիկյան «Մայքրոսոֆթ» կորպորացիայի գործին՝ տեղեկացնելով, որ Հանձնաժողովը դիմում-բողոք է ստացել կորպորացիայի ՀՀ –ում լիազոր ներկայացուցիչը հանդիսացող «ԲԻ ԷՍ ԷՅ» ընկերության կողմից:
Ընկերությունը հայտնել է, որ ինչպես աշխարհի բոլոր երկրներում, այնպես էլ Հայաստանում, տեղեկատվական տեխնոլոգիաների ոլորտի առաջատար ընկերություններից մեկի՝ «Մայքրոսոֆթի» շահերի եւ հեղինակային իրավունքների պաշտպանությամբ հանդես է գալիս իրենց ընկերությունը:
Ըստ դիմում-բողոքի, հանրապետությունում համակարգիչների վերավաճառքով զբաղվող ընկերություններում կատարված գաղտնի ստուգումների եւ մոնիթորինգի արդյունքում պարզվել է, որ տասնյակ ընկերություններ գնորդներին վաճառում են «Մայքրոսոֆթի» կողմից մշակված ծրագրերի չարտոնագրված, այլ կերպ ասած՝ հենային տարբերակները:
Հանձնաժողովի կողմից հարուցված վարչական վարույթի շրջանակներում բացահայտվել են տասնյակ դեպքեր, երբ, իսկապես մի շարք ընկերություններ գնորդներին վաճառել են «Մայքրոսոֆթի» չարտոնագրված տարբերակները: Հանձնաժողովի դիտարկմամբ, նման գործունեությունը կարող է առաջին հերթին վնաս պատճառել սպառողին, որոնք կրում են չարտոնագրված ապրանք ձեռք բերելու ռիսկը, եւ, բացի այդ, այն նաեւ կարող է լուրջ խնդիր առաջացնել տվյալ շուկայում օրինական գործունեություն իրականացնող տնտեսվարողների համար՝ վնասելով նրանց շահերին:
Հետեւապես, համակարգչային տեխնիկայի վաճառքով եւ սպասարկմամբ զբաղվող մի շարք ընկերությունների գործունեությունը դիտարկվել է որպես անբարեխիղճ մրցակցության դրսեւորում, ինչի համար օրենքով սահմանված կարգով վերջիններս ենթարկվել են պատասխանատվության: