Ռուսաստանի Դաշնության Տուլայի շրջանում հունիսի 18-ին վթարված Երեւան-Մոսկվա միկրոավտոբուսի վարորդ Կարապետ Մողրովյանին կալանավորելուց հետո «Քոչար տուր» ՍՊԸ-ի տնօրենն անցել է ընդհատակ:
Երբ դեպքը նոր էր տեղի ունեցել եւ վարորդն ազատության մեջ էր, ընկերության տնօրեն Արամ Քոչարյանը վթարից մանրամասներ էր ներկայացրել լրատվամիջոցներին:
«Կարապետի հետ խոսել եմ, ինքը պատմել է, որ ԿԱՄԱԶ-ը կանգնած է եղել եւ կտրուկ տեղից պոկվել է, Կարապետն էլ հնարավորություն չի ունեցել փախցնելու, որովհետեւ կողքից այլ մեքենաներ է ընթացել, փորձել է կանգնեցնել մեքենան ու հարվածել է ԿԱՄԱԶ-ին: Միեւնույն գծով էին ընթանում, այնպես չէ, որ Կարապետը դուրս է եկել իր գծից»,- NEWS.am-ի հետ զրույցում մասնավորապես ասել էր տնօրեն Արամ Քոչարյանը:
Վթարից հետո հայկական միկրոավտոբուսի վարորդը 2 ամսով վերցվել է կալանքի: Արդեն մի քանի օր է՝ փորձում ենք կապ հաստատել Արամ Քոչարյանի հետ, սակայն ապարդյուն: Ոչ կանոնավոր ուղեւորափոխադրում իրականացնող ընկերության ֆեյսբուքյան էջը չի գործում, կայքում տեղադրված բջջային հեռախոսահամարներից միայն մեկն է հասանելի, այն էլ զանգերին պատասխանող տղամարդը բավականին նյարդային ասում է, որ ինքն Արամ Քոչարյանը չէ եւ անջատում է հեռախոսը:
Թե ինչու է ընկերությունն անցել ընդհատակ, պարզ չէ: Նշենք, որ այս ընկերությունը գործում է Արթիկում: Կալանավորված վարորդը նույնպես արթիկցի է:
Ավելի վաղ հայտնել էինք, որ 2017թ. հունիսի 18-ին М-4 մայրուղու վրա, Վենեւսկի շրջանի Կոնչինկա բնակավայրի մերձակայքում (Տուլայի երկրամաս) բախվել են միկրոավտոբուսը եւ ԿԱՄԱԶ մակնիշի ավտոմեքենան: Վթարի հետեւանքով կա 1 զոհ, 9 վիրավոր: Փաստի առթիվ նյութեր են նախապատրաստվում:
