Հայաստանում սա քաղաքական ավանդույթ է եւ քաղաքական վարքի միջոց, որն ուղղված է առկա իրավիճակից բնակչության որոշ լայն դժգոհությանը: Հունիսի 26-ին` լրագրողների հետ հանդիպման ժամանակ այս մասին ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը` մեկնաբանելով «Ժառանգություն» կուսակցության առաջնորդ Րաֆֆի Հովհաննիսյանի խոստումը` 2018 թվականին Հայաստանում թավշյա հեաղափոխություն կազմակերպելու մասին, եթե գործող նախագահ Սերժ Սարգսյանը փորձի այս կամ այն ձեւով իշխանության մնալ:
Քաղաքագետի խոսքով` հասկանալի է, որ քաղաքական գործիչները փորձում են քաղաքական շուկայում այսպես աշխատել, բայց մյուս կողմից` երբ սա ասում են 25 տարի, ապա մեթոդը դադարում է արդյունավետ լինել: «Ես արդեն 15 տարի Հայաստանում եմ ապրում: Ճշգրիտ չեմ հաշվել, բայց հավանաբար, գրեթե մեկ ամսվա տարբերությամբ ինձ ինչ-որ մեկն այս 15 տարիներին անընդհատ հեղափոխություն է խոստանում»,- գժգոհեց Իսկանդարյանը:
Փորձագետի համոզմամբ` Հայաստանում դժվար թե մարդ գտնվի, ով լրջորեն հավատում է, որ հեղափոխություն կիրականացվի` հատկապես հաշվի առնելով 20 տարի շարունակ նման խոստումների հաճախակիությունը: «Մարդիկ դրան սպասում են: Փորձում են մարդկանց այն արտադրանքը վաճառել, որը նրանք ցանկանում են գնել, բայց չէ՞ որ այլ հարց է, որ այս արտադրանքն արդեն ընդհանրապես չեն գնում: Ես չեմ կարծում, որ սա պետք է դույզն-ինչ լուրջ ընդունել, առավել եւս` եթե հնչեցրել է մի կուսակցություն, որը նույնիսկ չկարողացավ ԱԺ անցնել»,- եզրափակեց Ալեքսանդր Իսկանդարյանը: