Եվրասիական Զարգացման Բանկը (ԵԶԲ) Արդշինբանկին տրամադրել է վերականգնվող վարկային գիծ 20 միլլիոն ԱՄՆ դոլարի չափով եւ 3 տարի ժամկետով: «Արդշինբանկ» ՓԲԸ Վարչության նախագահ Մհեր Գրիգորյանը եւ ԵԶԲ-ի Ակտիվների եւ պարտավորությունների գծով տնօրեն Դմիտրի Լադիկով-Ռոեվը համապատասխան պայմանագիրը ստորագրեցին սույն թվականի հունիսի 28-ին:
Միջոցները նախատեսված են ֆինանսավորելու Արդշինբանկի հաճախորդների արտաքին առեւտրային գործարքները ԵԶԲ անդամ պետություններում: Վարկն ամբողջությամբ ուղղվելու է ԵԶԲ անդամ պետությունների միջեւ արտահանման եւ ներմուծման գործարքների ֆինանսավորմանը:
Ֆինանսավորումը կատարվում է ԱՄՆ դոլարով, Եվրոյով, ՌԴ ռուբլով կամ ԵԶԲ պետությունների այլ արժույթներով:
Պայմանագիրը կնպաստի ԵԶԲ անդամ պետությունների միջեւ առեւտրի ընդլայնմանը՝ ստեղծելով նախապայմաններ պետությունների ինտեգրացիոն գործընթացների հետագա զարգացման համար:
Արդշինբանկը հանդիսանում է Հայաստանի երկրորդ խոշորագույն բանկը եւ ունի լայն մասնաճյուղային ցանց (64 մասնաճյուղ): Բանկը Հայաստանի միակ մասնավոր կառույցն է, որն ունի միջազգային հեղիանակավոր վարկանշային երկու գործակալություններից (Moody’s եւ Fitch) ստացված վարկանիշ` հավասար Հայաստանի Հանրապետության վարկանշային մակարդակին:
Եվրասիական զարգացման բանկը (ԵԶԲ) Ռուսաստանի եւ Ղազախստանի կողմից 2006 թվականի հունվարին հիմնադրված միջազգային ֆինանսական կառույց է, որը կոչված է նպաստելու անդամ պետությունների միջեւ շուկայական տնտեսական հարաբերություններ խթանմանը եւ դրանց միջեւ կայուն տնտեսական աճի եւ առեւտրատնտեսական կապերի զարգացմանը: ԵԶԲ կանոնադրական կապիտալը 7 միլիարդ ԱՄՆ դոլար է: ԵԶԲ անդամ պետություններն են Հայաստան Հանրապետությունը, Բելառուսը, Ղազախստանը, Ղրղզստանի Հանրապետություն, Ռուսաստանի Դաշնությունը Տաջիկստանի Հանրապետությունը:
