Վրաստանի խորհրդարանի պատգամավորների էլեկտրոնային փոստերը կիբերհարձակման են ենթարկվել։ Այս մասին հաղորդում է «Նովոստի Գրուզիա»-ն՝ վկայակոչելով «Ռուսթավի 2» հեռուստաալիքը։
Հեռուստաընկերության տվյալներով՝ երեկ վրացի պատգամավորներից շատերը կիբերհարձակման մասին հաղորդագրություններ են ստացել, որտեղ նրանց խնդրում էին զերծ մնալ էլեկտրոնային փոստն օգտագործելուց։
«Հաղորդագրություններ, թվում է, ստացել են բոլոր խորհրդարանականները։ Ըստ երեւույթին, հարձակում է տեղի ունեցել, շատ վիրուսային հղումներ կան եւ դա սպառնում է համակարգի պաշտպանությանը։ Երեկ մեզ հայտնեցին սահմանափակումների մասին, իսկ այսօր հայտնեցին, որ ամեն ինչ հարթվել է»,-ասել է ընդդիմադիր «Շարժում հանուն ազատության-Եվրոպական Վրաստան» կուսակցության պատգամավոր Սերգո Ռաթիանին։
Տվյալներ չկան, թե կոնկրետ ով է կոտրել պատգամավորների կամ առհասարակ խորհրդարանական սերվերից օգտվողների էլեկտրոնային փոստերը։ Վրաստանի ՆԳՆ-ում հայտարարել են, որ փորձում են պարզաբանել իրավիճակը։
Նախօրեին հարձակման է ենթարկվել նաեւ դանիական APM Terminals ընկերությունը, որին պատկանում է Վրաստանի Փոթի նավահանգիստը։
