Միջազգային հարաբերությունների ժամանակակից ճգնաժամի պայմաններում ավելի է մեծանում դիվանագիտության դերը։ Այս մասին հայտարարել է Բելառուսի նախագահ Ալեքսանդր Լուկաշենկոն՝ ՀԱՊԿ անդամ-երկրների արտաքին գործերի նախարարների հետ հանդիպման ժամանակ, փոխանցում է БЕЛТА-ն։
«Միջազգային հարաբերությունների ժամանակակից ճգնաժամի պայմաններում ավելի է մեծանում դիվանագիտության դերը։ Հենց դիվանագետները պետք է ջանքեր գործադրեն, որպեսզի բացառեն վիճելի հարցերում ուժի դիմելու անգամ ամենափոքրիկ հնարավորությունը»,- հայտարարել է Բելառուսի նախագահը։
Ալեքսանդր Լուկաշենկոյի խոսքով՝ դիվանագիտության խնդիրն է նախադրյալներ ստեղծել բոլոր շահագրգռված կողմերի համար եւ համաձայնեցված մոտեցումներ մշակել։ Նա նշել է, որ ՀԱՊԿ-ի գոյության ընթացքում բազաֆունկցիոնալ կառույց է ձեւավորվել, որը կարողանում է արդյունավետ հակազդել ժամանակակից մարտահրավերներին ու սպառնալիքներին։
«Սակայն չի կարելի բավարարվել ձեռք բերածով։ Աշխարհում իրավիճակը տագնապալի է, անհրաժեշտ է մեծ ուշադրություն դարձնել մեր պետությունների անվտանգությանը։ Եվ ոչ միայն ռազմական, այլեւ քաղաքական տեսանկյունից»,- ասել է Լուկաշենկոն։
Լուկաշենկոն արձանագրել է, որ ինչպես առանձին երկրների, այնպես էլ դաշինքների շահերի բախման աշխարհագրություններն ու ոլորտներն ընդլայնվում են, թուլանում են խաղաղություն ու անվտանգութուն պահպանելու համընդհանուր սկզբունքները։ «Որպես հետեւանք, բազմանում են ուժերի հավասարակշռությունը խախտելու փորձերը»,-եզրափակել է Բելառուսի նախագահը։