Հայաստանի կառավարության առաջնահերթությունն են պաշտպանությունը եւ ենթակառույցները: Այս մասին մամուլի ասուլիսի ժամանակ հայտարարեց ֆինանսների նախարար Վարդան Արամյանը՝ ներկայացնելով կառավարության 2018-2020 թվականների միջնաժամկետ ծախսերի ծրագիրը:
Նրա խոսքով՝ կառավարությունը պաշտպանական ծախսերը չի կրճատի, ինչպես նաեւ արտաքին պարտքի սպասարկման ծախսերը: «Մեզ համար մյուս առաջնահերթությունը կապիտալ շինարարությունն է՝ ճանապարհների, ոռոգման համակարգերի, էլեկտրահաղորդման գծերի: Այս ամենը բիզնեսի զարգացման համար լավ պայմաններ կստեղծի»,- ասաց նախարարը:
Այս պատճառով ՀՆԱ-ում կապիտալ ծախսերի բաժինը կաճի՝ 2017-ի 2,9 տոկոսից մինչեւ 2020-ին 5,5 տոկոս: Առաջին հերթին այս նպատակներին կուղղվեն նաեւ արտասահմանյան վարկերը: Չնայած պետությունը պատրաստվում է տնտեսել (2017-ին պետական բյուջեի պակասուրդը ցանկանում են կրճատել 5,5 տոկոսից մինչեւ 2,8-2,3), սակայն ենթակառույցների համար ծախսելն ափսոս չէ. դրանք ապագա աճի հիմքերն են դնում:
Այսպես՝ 2017-ին այս ծախսերը կկազմեն 98 մլրդ դրամ, իսկ 2020-ին՝ կաճեն արդեն մինչեւ 383 մլրդ: Իսկ ընդհանուր առմամբ, արտաքին ծրագրերի ծախսերը (ներառյալ կառավարության համաֆինանսավորումը) 2018 թվականին կկազմեն բյուջեի 14 տոկոսը, 2020-ին՝ 16 տոկոսը: Բայց ահա սոցիալական պաշտպանության, մշակույթի եւ կրթության ծախսերը կկրճատեն 41 տոկոսից մինչեւ 36 տոկոս: Ուժային գերատեսչությունների ծախսերը կմնան 20 տոկոսի մակարդակին:
