Սննդամթերքի անվտանգության մասով իրականացվում է բավականին ծավալուն աշխատանք, որն ուղղված է տարբեր ոլորտների՝ սննդամթերքի անվտանգության արտադրություններին, կաթնամթերքի վերամշակման, պաղպաղակ արտադրող ընկերություններին: Այս մասին, այսօր՝ հուլիսի 20-ին, կառավարության նիստից հետո լրագրողների հետ զրույցում նշել է ՀՀ գյուղնախարարության սննդամթերքի անվտանգության պետական ծառայության պետ Իշխան Կարապետյանը:
Նրա խոսքով, իրականացվում է բուսասանիտարական մոնիթորինգ, կատարվում է սանիտարական կենդանական ծագման ապրանքների մասով հսկողություն, ակտիվ աշխատանքներ են տարվում պարտադիր սպանդանոցային մորթի անցման ուղղությամբ։
«Ներդրվում են տրանսպորտային միջոցների սանիտարական անձնագրերի մեխանիզմներ հաց ու միս տեղափոխող տրանսպորտային միջոցների համար, մոտ ժամանակներս մենք այդ ուղղությամբ բավականին ակտիվ մեդիաարշավ կիրականացնեք», - նշեց Իշխան Կարապետյանը։
Անդրադառնալով մամուլի հրապարակմանը, ըստ որի՝ լաբորատոր փորձաքննության է ներկայացվել 8 արտադրողի «Պլոմբիր» տեսակի պաղպաղակ, որոնցից միայն 3-ն են համապատասխանել սահմանված նորմերին Իշխան Կարապետյանն ասաց, որ սահմանված ընթացակարգին համապատասխան ծառայությունն իրականացնում է նախապես պլանավորած ստուգումներ. «Բնականաբար, կան արդյունքները, կան կասեցումներ եւ ոչնչացված ապրանքներ: Երբ ստուգման արդյունքները կավարտվեն տվյալ ամսվա համար, մենք տեղեկավտությունը կտրամադրենք»:
