Մասնավոր «Սուրբ Թերեզա» բժշկական համալսարանի ռեկտոր Լարիսա Համբարձումյանը տուգանվեց 300 հազար դրամով՝ կեղծ փաստաթղթեր տրամադրելու համար:
Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում Համբարձումյանը հայտարարել է, որ ընդունում է իրեն առաջադրված մեղադրանքը եւ միջնորդել է դատաքննությունն անցկացնել արագացված կարգով:
Դատավորը ռեկտորին մեղավոր է ճանաչել եւ տուգանել 300 հազար դրամով:
NEWS.am-ի հետ զրույցում Լարիսա Համբարձումյանի պաշտպան Արման Առաքելյանը նշեց, որ դեռեւս չեն որոշել՝ Վերաքննիչ դիմելու են, թե ոչ:
Հիշեցնենք, որ ըստ մեղադրական եզրակացության՝ Սուրբ Թերեզայի անվան բժշկական համալսարանի ռեկտոր Լարիսա Համբարձումյանը 2015 եւ 216 թվականներին մի շարք շրջանավարտների հետ առանց ուսման վերաբերյալ պայմանագրեր կազմելու, հրահանգել է համալսարանի դեկաններին նշված ուսանողների կողմից դասընթացներին և ընթացիկ քննություններին բացակայությունները չնշել մատյաններում: Այդ պայմաններում Լարիսա Համբարձումյանը թույլատրել է նշված ուսանողներին մասնակցել պետական ավարտական քննություններին և դրանք հանձնելուց հետո տրամադրել է պետական նմուշի ավարտական դիպլոմներ:
Նշենք, որ սա առաջին դեպքը չէ այս տարվա ընթացքում, որ ռեկտորին նման մեղադրանք է առաջադրվում: Երկու ռեկտոր արդեն իսկ դատարանի որոշմամբ տուգանվել է:
