Դեբեդ գետի վրա ՀԷԿ-ի նախագծի հանդեպ վերաբերմունքը կորոշվի բնապահպանական նորմերի պահպանումով։ Այս մասին հայտնել է բնապահպան, Հայաստանի բնապահպանության նախկին նախարար Կարինե Դանիելյանը, NEWS.am-ի թղթակցի խնդրանքով մեկնաբանելով Հայաստանի կառավարության համապատասխան որոշումը։
Փորձագետը հիշեցրել է, որ աշխարհում հիդրոկայաններին դրական են վերաբերվում՝ դրանք դիտարկելով որպես էլեկտրաէներգիայի ստացման այլընտրանքային միջոց։ «Բայց Հայաստանում այլ իրավիճակ է։ Գետերը ծանրաբեռնված են փոքր ՀԷԿ-երով, ոչ ոք չի պահպանում բնապահպանական նորմերը։ Արդյունքում գետերը վերածվում են ջրանցքների, փոխվում է գետերի էկոհամակարգը։ Դա ազդում է մոտակա բնակավայրերի ու գյուղացիների տնտեսություննեի վրա՝ նրանց զրկելով ոռոգման ջրից։ Դրա համար էլ , եթե ամեն ինչ իրականացվի բնապահպանական նորմերի պահպանումով, որպեսզի էկոհամակարգը չտուժի, ապա բնապահպանները չպետք է դեմ լինեն։ Բայց փորձը ցույց է տալիս, որ սովորաբար տեղի է ունենում ոչ այդպես»,- նկատեց Կարինե Դանիելյանը։