Այս գիշեր Վանաձորի գլխավոր՝ Հայքի հրապարակում անհանգիստ է եղել. դեռեւս պարզ չէ, ում կողմից, ջարդվել է քաղաքի անվանմամբ նստարաններից մեկը: Վնասվել է նաեւ կից տեղադրված փայտաշեն աղբարկղը:
NEWS.am-ի թղթակիցը հաղորդում է, որ առավոտյան ջարդված ու կողաշրջված նստարանի կողքին նաեւ մեքենայի դետալներ են ընկած եղել:
Ի դեպ, գիշերային ժամերին ավտովազքերը քաղաքի գլխավոր հրապարակում պարբերական բնույթ են կրում: Առավոտյան արդեն դրա հետեւանքները վանաձորցիների համար ակնհայտ են լինում ծաղկանոցներում երեւացող անվադողերի հետքերով ու ջարդված սալիկերի ու հենասյուների տեսքով:
NEWS.am-ի թղթակցի հետ զրույցի ընթացքում Վանաձորի քաղաքապետարանի կոմունալ տնտեսության ու բարեկարգման բաժնի պետ Կարեն Պառավյանը նշեց, որ տեղյակ են խնդրի մասին: «Ամենայն հավանականությամբ ինչ-որ մեկը մեքենայով հարվածել է նստարանին»,- նշեց նա:
Վերջինիս խոսքով Վանաձոր անվամբ նստարաններից յուրաքանչյուրի համար համայնքային բյուջեից հատկացումը կազմել է շուրջ 160.000 դրամ: Մինչ քաղաքապեարանում մտածում են ջարդված նստարանն ու աղբարկղը վերանորոգելու կամ նորով փոխարինելու մասին, Վանաձորի Տարոնի բաժնի ոստիկաններն զբաղված են բարբարոսության հեղինակին որոնելու աշխատանքներով: