2008 թվականի օգոստոսի վրաց-ռուսական պատերազմը հայկական կոնյակի արտահանման վրա անմիջական ազդեցություն է ունեցել: Այս մասին օգոստոսի 18-ին՝ լրագրողների հետ հանդիպման ժամանակ ասաց Հայաստանի Գինեգործների միության նախագահ Ավագ Հարությունյանը:
Հարությունյանի խոսքով՝ սա կապված է այն հանգամանքի հետ, որ որոշ երկրներ, մասնավորապես Ուկրաինան, կոնյակի արտահանման հարցում վրացամետ դիրքորոշում են որդեգրել՝ հայկականից հրաժարվելով: «Նրանք վրացական կոնյակի արտադրանքին շատ ավելի մեծ տեղ եւ արտոնություններ են հատկացրել, քան, ասենք, Ռուսաստանում: Նույնը տեղի ունեցավ նաեւ Լեհաստանում: Այսինքն՝ նրանք հայկական կոնյակը կապում են Ռուսաստանի հետ, դրա հետեւանքով այն ստիպված է վրացական կոնյակի հետ նրա տարածքից դուրս գործնականում անհավասար մրցակցության մեջ մտնել»,- պարզաբանեց փորձագետը՝ հավելելով, որ վերջին 2-3 տարում վրացական գինու բաժնի աճ է նկատվում նույնիսկ ռուսական շուկայում:
Ինչպես նշեց Գինեգործների միության նախագահը, հայկական կոնյակի արտահանման դասական շուկաներ են համարվում հետխորհրդային երկրները, ինչպիսին են Ռուսաստանը, Ղազախստանը, Բելառուսը, Ուկրաինան եւ Արեւելյան Եվրոպայի երկրները, օրինակ՝ Լեհաստանը: