Հաջորդ տարի Դիարբեքիրում կայանալիք Սուրբ Կիրակոս եկեղեցու բացման ժամանակ թուրքերը կկազմակերպեն ճիշտ այնպիսի շոու, ինչպիսին կազմակերպեցին Աղթամարի Սուրբ Խաչի պատարագի դեպքում։ Այսօր՝ դեկտեմբերի 6-ին, լրագրողների հետ հանդիպման ժամանակ նման կանխատեսմամբ հանդես եկավ թուրքագետ Արտակ Շաքարյանը։
«Կրկին շոու կկազմակերպվի։ Եկեղեցու մասին ռեպորտաժներ կցուցադրվեն CNN եւ այլ հեղինակավոր հեռուստաընկերություններով։ Սուրբ Կիրակոսի բացումը լայնորեն կլուսաբանվի, մանավանդ այն պատճառով, որ տարիներ առաջ այդ սրբավայրը քուրդ թմրամոլների հավաքատեղի էր։ Ճիշտ է, վերաբացումից հետո եկեղեցին կգործի որպես հոգեւոր երաժշտության համերգասրահ, սակայն փաստը, որ հայկական եկեղեցի է վերանորոգվում, արդեն իսկ լավ է»,- նշեց Շաքարյանը։
Անդրադառնալով Աղթամարի Սուրբ Խաչի պատարագին՝ թուրքագետն ասաց, որ իր կարծիքով, այն ժամանակ Հայաստանը պետք է Թուրքիա ուղարկեր անգլերենին փայլուն տիրապետող, 30-50 հոգուց բաղկացած պատմաբանների եւ վերլուծաբանների մի խումբ, որն էլ կմասնակցեր թուրքական լրատվամիջոցների հաղորդումներին եւ կներկայացներ հայկական կողմի տեսակետը։ «Իհարկե, վարչապետի եւ Մշակույթի նախարարի մակարդակով ներկայացվածություն հարկավոր չէր, պարզապես եթե թուրքերը շոու էին կազմակերպում, մենք եւս պետք է մասնակցեինք այդ շուուին։ Եթե խաղի մեջ չես, դրա կանոնները քո դեմ են»,- բացատրեց Արտակ Շաքարյանը:
Նշենք, որ Վանի Աղթամար կղզու Սուրբ Խաչ եկեղեցում գրեթե հարյուրամյա դադարից հետո Սուրբ Խաչ եկեղեցում պատարագ մատուցվեց 2010-ի սեպտեմբերի 19-ին։
