Ղազախստանը Եվրասիական տնտեսական միությունում (ԵՏՄ) կարող է շատ հարցերի լուծման պարագայում առաջնորդ լինել։ Այս մասին հայտարարել է ՌԴ առաջին փոխվարչապետ Իգոր Շուվալովն Աստանայում «Եվրասիական շաբաթ» ֆորումում ունեցած ելույթում, փոխանցում է «Ինտերֆաքս»-ը։
«Այստեղ բավական վտանգավոր է Ռուսաստանի՝ առաջնորդի դերը ստանձնելը։ Չնայած մենք ունենք ե՛ւ մասնագետներ, ե՛ւ ըմբռնում, ե՛ւ հաստատված օրակարգ։ Բայց երբ մենք առաջնորդի դեր ստանձնենք, կսկսեն անմիջապես լուրեր պտտվել, թե սա Կրեմլի քաղաքական նախագիծն է եւ այլն։ Այս նախագծում մենք առաջնորդ ենք համարում Ղազախստանին, քանի որ Ղազախստանի նախագահն այդ գաղափարի հիմնադիրն է։ Նա դեռ 90-ականներին առաջ քաշեց եվրասիականության եւ եվրասիական գործընկերության գաղափարը»,- ասել է Շուվալովը։
«Սահմանափակումների շուրջ խնդիրների, թվային տնտեսություն կառուցելու, մի շարք լուրջ խնդիրների եւ Եվրասիական տնտեսական միության զարգացման հարցում մենք կցանկանայինք տեսնել Ղազախստանի առաջնորդությունը»,- նշել է նա։
Փոխվարչապետը հույս է հայտնել, որ ԵՏՄ-ի մյուս գործընկերները կսատարեն իր դիրքորոշումը։
«Տվյալ դեպքում մենք բոլորս նայում են Նուրսուլթան Աբիշեւիչին՝ որպես Եվրասիական գործընկերության այս արժեքի ավագի եւ առաջնորդի։ Մենք հույս ունենք, որ առաջխաղացման նախաձեռնությունը կձեւավորվի Ղազախստանում»,- հավելել է նա։
