Հայաստանում դպրոցական պարագաների գներում փոփոխություններ չեն արձանագրվել, սակայն բնակչության գնողունակությունը նվազել է: Օգոստոսի 24-ին լրագրողների հետ հանդիպմանը նման կարծիք հայտնեց «Սպառողների խորհրդատվության կենտրոն» կազմակերպության նախագահ Կարեն Չիլինգարյանը:
Նրա խոսքով՝ ոչ միայն գնային լուրջ փոփոխություններ չեն գրանցվել, այլեւ դպրոցական որոշ պարագաների դեպքում նույնիսկ որոշակի գնանկում կա: Սակայն, Չիլինգարանի խոսքով, դա չի փոխում իրավիճակը:
«Մեր երկրում «անապահով խավ» եզրույթն ամրապնդվեց այն պատճառով, որ նման մարդկանց թիվն իսկապես ավելացել է: Եթե նախկինում բնակչության 30-32%-ն անապահով էր համարվում, ապա հիմա արդեն այդ թիվը նույնիսկ 40%-ի է հասնում»,- պարզաբանեց Չիլինգարյանը:
Նա, միաժամանակ, կարծիք հայտնեց, որ արտագաղթի բարձր մակարդակը նույնպես երկրում գնողունակության անկման կարեւոր պատճառներից է: