Թուրքիայի՝ Եվրասիական տնտեսական միությանն անդամակցելու հավանականությունը զրոյական է։ Այս մասին NEWS.am-ի հետ զրույցում հայտարարել է Ծառուկյան դաշինքի պատգամավոր, տնտեսագետ Վարդան Բոստանջյանը։
«Թուրքիայի նախարարի հայտարարությունը ԵՏՄ–ին անդամակցելու վերաբերյալ թուրքական դիվանագիտության ողորմելի խաղերից է, որն այդուհանդերձ ընդունվում է որոշ ուժերի կողմից։ Իբրեւ թե արեւմտյան երկրներին ուզում է ասի՝ տեսեք, եթե հանկարծակի ուրիշ բան անեք, ես իմ գործունեության վեկտորը կփոխեմ, որը երբեք, իհարկե, տեղի չի ունենա»,–ասել է Վարդան Բոստանջյանը՝ հավելելով, որ Ռուսաստանն էլ շատ լավ գիտի՝ ում հետ գործ ունի։
Ըստ Բոստանջյանի՝ Ռուսաստանը երբեք կողմ չի լինի, որ Թուրքիան, որը Հայաստանի հետ ունի փակ սահմաններ ու ոչ բարեկամական հարաբերություններ, լինի այդ միության անդամ։
«Այստեղ ոչ այնքան փակ սահմանների հարցն է, որքան Թուրքիայի հետ Հայաստանի կոնֆլիկտի հարցը։ Անդամակցության հայտարարությունը զավեշտալի բան է։ Դա Եվրամիությանը վախեցնելու համար էր։ Այսօր Գերմանիայի նման երկիրն ասում է՝ ձեզ կարգին պահեք, Թուրքիան էլ իր ոճով է արձագանքում, որը իհարկե, կարող է շատ բան նշանակել, բայց որոշ դեպքերում էլ քաղաքական խաղ լինել, դա բոլորն էլ հասկանում են՝ ինչ է։ Համոզված եմ, որ Թուրքիան բացարձակապես հայացքը չի ուղղի հյուսիս կամ արեւելք»։