iPhone-ի նոր մոդելները հավաքելիս տեղի է ունեցել արտադրական խափանում, ինչը հետագայում կարող է Apple-ի նոր սմարթֆոնների մատակարարումների դեֆիցիտ առաջացնել, հայտնում է The Wall Street Journal-ը՝ վկայակոչելով աղբյուրներին: Նրանց խոսքով՝ ամռանը տեղի ունեցած խափանման հետեւանքով նոր iPhone-ների արտադրության ժամանակացույցը մեկ ամսով առաջ է տարվել:
Հավաքելու գործընթացն արագացնելու համար Foxconn Technology Group (Apple-ի կապալառու) ընկերությունը ստիպված է Չինաստանի Չժենչժոու քաղաքում գտնվող իր գործարանում մեծացնել արտադրական հզորությունները: WSJ-ի տեղեկություններով՝ ընկերությունը սկսել է աշխատակիցներին հավելավճարներ տալ, որոնք օգնում են գործարան նոր աշխատակիցների ներգրավել: Պարբերականը հայտնում է, որ հունիսին Foxconn-ի ձեռնարկություններում աշխատել է մոտ 250 հազար մարդ: Apple-ի եւ Foxconn-ի ներկայացուցիչները հրաժարվել են տեղեկությունները մեկնաբանելուց:
Նոր iPhone-ի շնորհանդեսը տեղի կունենա հաջորդ շաբաթ՝ սեպտեմբերի 12-ին: Ենթադրվում է, որ այն, հնարավոր է, հետաձգվի մասերի մատակարարումների խնդիրների պատճառով: Ինչպես սպասվում է, սմարթֆոնի նոր տարբերակն ունենալու է օրգանական լուսադիոդներից պատրաստված, եզրերում շրջանակ չունեցող դիսփլեյ, որը կզբաղեցնի առջեւի ամբողջ մակերեւույթը: