2018-ի ապրիլին Ազգային ժողովում իրադրությունը կաշխուժանա։ Այս մասին սեպտեմբերի 15-ին՝ խորհրդարանական ճեպազրույցների ժամանակ, հայտարարեց ՀՅԴ խորհրդարանական խմբակցության ղեկավար Արմեն Ռուստամյանը։
Նրա խոսքով՝ 2018-ի ապրիլի 9-ին, երբ կլրանա երկրի գործող նախագահի լիազորությունների ժամկետը, իրադրությունը կաշխուժանա, եւ դա բոլոր խորհրդարանական ուժերին է վերաբերում։ Ռուստամյանը չխոսեց այն մասին, թե ՀՅԴ-ն ում է տեսնում վարչապետի պաշտոնում, սակայն քիչ հավանական համարեց ՀՀԿ-ի հետ համագործակցության հարցում փոփոխությունները։
Նա հավելեց, որ կառավարությունն ավելի թափանցիկ է սկսել աշխատել․ «Կարելի է հիշատակել փոփոխությունները թեկուզ հարկայինում կամ մաքսայինում, երբ ստուգումները 50 տոկոսով կրճատվեցին եւ մուտքերն ավելացան։ Կտրուկ փոփոխություններ են տեղի ունեցել ղարաբաղյան հարցում եւ հայ-թուրքական հարաբերություններում դիրքորոշման մեջ»,-նշեց Արմեն Ռուստամյանը։
