Երեւանում մեկնարկել է «Եվրոպան Հայաստանում էքսպո» բազմաոլորտային առեւտրի եւ ներդրման առաջին ցուցահանդես՝ Հայաստանում ԵՄ ընկերությունների համար:
Հայաստանում ԵՄ պատվիրակությունից NEWS.am-ին հայտնում են, որ այս նախաձեռնությունն առաջին ցուցահանդեսն է Հայաստանում՝ նվիրված բացառապես եվրոպական եւ հայկական ընկերությունների միջեւ առեւտրական կապերի խթանմանն ու զարգացմանը, որը կազմակերպվել է Հայաստանում Եվրոպական միության պատվիրակության կողմից, Եվրոպական բիզնես ասոցիացիայի ու Հայաստանում գործող ԵՄ առեւտրաարդյունաբերական պալատների հետ համատեղ:
ԵՄ-ն՝ առեւտրի ոլորտում Հայաստանի հիմնական գործընկերներից մեկը, մշտապես կարեւորում է անդամ երկրների եւ Հայաստանի միջեւ արդյունավետ առեւտրային համագործակցությունը: Չունենալով ելք դեպի ծով՝ համեմատաբար փոքր ներքին շուկա ունեցող Հայաստանը դարպաս է բազմաթիվ խոշոր տնտեսական շուկաների, որտեղ այն օգտվում է արտոնյալ հնարավորություններից: Եվրոպական միության հետ առեւտուր իրականացնելիս Հայաստանն օգտվում է ԵՄ Արտոնությունների ընդհանրացված համակարգից (GSP+). 6300 հայկական ապրանքներ արտահանվում են ԵՄ առանց մաքսատուրքի: Դրանով պայմանավորված՝ Եվրոպական միությունը հայկական արտադրանքի համար առաջնային արտահանման գոտի է: Ինչպես անցյալում, այնպես եւ այսօր, Հայաստանը, գտնվելով մշակույթների եւ ազդեցությունների խաչմերուկում, հրաշալի հարթակ է առեւտրի զարգացման համար:
ԵՄ անդամ երկրների կապիտալով գործող ընկերությունների ցուցադրվող տարատեսակ ապրանքատեսակներով առեւտրի այս ցուցահանդեսը, ոգեշնչվելու, մշակութային եւ լեզվական խոչընդոտները հաղթահարելու համար մի հարթակ է՝ հանուն փոխշահավետ առաջադեմ բիզնես գաղափարների:
Առեւտրի ցուցահանդեսի նպատակն է խթանել Եվրոպական միության եւ Հայաստանի միջեւ ապրանքաշրջանառությունը, ուսումնասիրել ներդրումների առավելությունները եւ եվրոպական ու հայկական արտադրողներին ու ծառայություններ մատուցողներին ընձեռել ներմուծման եւ արտահանման նոր հնարավորություններ:
Ցուցահանդեսը տեղի է ունենում ԵՄ անդամ երկրների եւ Հայաստանի կառավարության աջակցությամբ, որը կապահովի գործարար համայնքի, ներդրողների եւ շահագրգիռ կողմերի ակտիվ ներգրավվածությունը:
Միջոցառմանը բացման խոսքով հանդես եկան Հայաստանում ԵՄ պատվիրակության ղեկավար դեսպան Պյոտր Սվիտալսկին, ՀՀ Արտաքին գործերի փոխնախարար Ռոբերտ Հարությունյանը եւ Եվրոպական հանձնաժողովի առեւտրի գլխավոր տնօրինության բաժնի ղեկավար Պետրոս Սուրմելիսը: Ելույթներից հետո տեղի ունեցավ կարճատեւ շրջայց եւ ծանոթացում ներկայացված բիզնեսների հետ:
«Եվրոպան Հայաստանում էքսպո» ցուցահանդեսի շրջանակում տեղի կունենա ԵՄ-Հայաստան-Իրան բիզնես ֆորում՝ կազմակերպված Հայասատնի զարգացման հիմնադրամի կողմից: Այն համախմբում է ԵՄ-ի, Հայաստանի, Իրանի եւ տարածաշրջանի մյուս երկրների մասնակիցներին: Քննարկման առանցքում է Մեղրիի ազատ տնտեսական գոտու ստեղծումն ու հայ-իրանական սահմանի սահմանի կառավարումը: Ցուցահանդեսի երկրորդ օրը ինչպես մասնավոր, այնպես էլ պետական հատվածների ներկայացուցիչների մասնակցությամբ կլոր սեղան քննարկումներ տեղի կունենան` Հայաստանը հայտնի զբոսաշրջային գոտի դարձնելու, ինչպես նաեւ բիզնեսի հաջողության համար խորհրդատուների դերի եւ արտահանման զարգացման թեմաներով:
Միջոցառումը մեկնարկել է սեպտեմբերի 15-ին եւ կշարունակվի մինչեւ սեպտեմբերի 17-ը, «Երեւան Էքսպո» կենտրոնում (հայտնի նաեւ որպես Մերգելյան Կլաստեր, հասցե Հ. Հակոբյան, շենք 3):