ՏՏ ոլորտում Հայաստանն աշխարհին ներկայանում է ոչ թե աշխատուժով, այլ՝ լուծումներով: Այս մասին, այսօր՝ սեպտեմբերի 15-ին, լրագրողների հետ հանդիպման ժամանակ նշել է Ձեռնարկությունների ինկուբատոր հիմնադրամի տնօրեն Բագրատ Ենգիբարյանը՝ անդրադառնալով «ԱրմԹեք 2017» ամենամյա գործարար համաժողովին, որն այս տարի տեղի է ունենալու սեպտեմբերի 27-ին Երեւանում:
Նրա խոսքով, Հայաստանում ՏՏ ոլորտի ընկերությունների թիվը հասնում է 500-ի՝ տարեկան 600 միլիոն դոլարի շրջանառությունով. «Հայաստանի նման երկրի համար սա աներեւակայելի չափանիշ է։ Մասնագետների թիվն անցնում է 15 հազարի շեմը, Հայաստանն արդեն որակական այլ դաշտ է գնում, եւ աշխարհին ներկայանում ենք ոչ թե աշխատուժով, այլ՝ մեր լուծումներով»:
Անդրադառնալով ոլորտի մասնագետների ՀՀ-ից արտահոսքին, Ենգիբարյանը նկատեց, որ վերջին 1,5 տարվա ընթացքում բավական կրճատվել է այդ հոսքը:
Իր հերթին, ասուլիսին ներկա «Սինոփսիս-Արմենիա» ընկերության գործադիր տնօրեն Հովիկ Մուսայելյանը նշեց, որ Հայաստանում ՏՏ ոլորտում միջին աշխատավարձը 1000-1200 դոլարի սահմաններում է, ինչը մրցունակ թիվ է։
Ավելի վաղ NEWS.am-ը հայտնել էր, որ սեպտեմբերի 27-ին Երեւանում տեղի կունենա «ԱրմԹեք-2017» համաժողովը, որը կտեւի մեկ օր: Համաժողովի կազմակերպիչներն են ՀՀ տրանսպորտի, կապի եւ տեղեկատվական տեխնոլոգիաների նախարարությունը, «Ձեռնարկությունների ինկուբատոր» հիմնադրամը։ Հիմնական գործընկերներն են Մայքրոսոֆը. ԱյԲիԷմ-ը, Սինոփսիսը եւ Ամերիկայի Հայ օգնության ֆոնդը։