ԵՄ ընդլայնման հարցերով եվրահանձնակատար Յոհաննես Հանը Սերբիային ու նրա հարեւաններին կոչ է արել շարունակել ԵՄ-ին անդամակցության քաղաքականությունը, փոխանցում է AP-ն։
«Սերբիան ու այսպես կոչված Արեւմտյան Բալկանները չափից երկար են համարվել Եվրոպայի ետնաբակը»,- ասել է Յոհաննես Հանը։ «Այսօր մարդիկ տեսնում են, որ այդ տարածաշրջանը արդեն ԵՄ-ի անկլավն է, անդամակցության օրինական իրավունքով»։
Ելույթ ունենալով ԵՄ-Սերբիա համաժողովի ժամանակ Բելգրադում ՝ Հանը նշել է, որ Բեռլինյան պատի ու «երկաթե վարագույրի» վերացումը սկիզբ են դրել Եվրոպայի վերամիավորմանը։ «Բայց այս գործընթացը, որը սկսվել է 1989-ին, կավարտվի միայն ԵՄ-ին Արեւմտյան Բալկանների բոլոր վեց երկրների միացումից հետո»,- ասել է Հանը։
Սերբիայի վարչապետ Անա Բրնաբիչը նշել է, որ ԵՄ-ին ինտեգրումը մնում է երկրի ռազմավարական նպատակն ու ամենակարեւոր առաջնայնություններից մեկը։
Սերբիան հրաժարվել է միանալ Ռուսաստանի դեմ ԵՄ պատժամիջոցներին։ Հանի խոսքով՝ դա պետք է փոխվի։ «ԵՄ-ին անդամակցությանը Սերբիայի հանձնառությունը նաեւ ենթադրում է, որ նա իր քաղաքականությունը կհամապատասխանեցնի ԵՄ-ի քաղաքականությանը»,- ասել է Հանը։ «Որպես ԵՄ կարեւոր գործընկեր ու որպես թեկնածու երկիր՝ Սերբիան պետք է այդ ուղղությամբ լրացուցիչ ջանքեր գործադրի։
