Քյոլնում կայացած քրդական հանրահավաքի պատճառով Թուրքիայի ԱԳՆ-ն բացատրությունների է կանչել Անկարայում Գերմանիայի դեսպանին։ Այս մասին հայտնել է Associated Press-ը։

Թուրքական կողմը վրդովված է, որ գերմանական իշխանությունները թույլատրել են անցկացնել հանրահավաք, որի ժամանակ ակտիվ գործածվել է Թուրքիայում արգելված Քրդական բանվորական կուսակցության խորհրդանիշերը։ Ակցիայի մասնակիցները նաեւ պահանջել են ազատ արձակել ՔԲԿ առաջնորդ Աբդուլալ Օջալանին, որը Թուրքիայում ցմահ ազատազրկման է դատապարտված 1999-ից։

Այդ կապակցությամբ Անկարան Գերմանիային մեղադրել է ահաբեկչության դեմ պայքարում երկակի չափորոշիչներ կիրառելու մեջ։

Քյոլնում հանրահավաքը կայացել է սեպտեմբերի 16-ին, Քրդական մշակույթի միջազգային փառատոնի շրջանակում։ Տեղական լրատվամիջոցների տվյալներով՝ դրան մասնակցել է մոտ 10 հազար մարդ։