Հայաստանը պատրաստ է խորացնել աշխատանքը սփյուռքի մասնագետների ցանցերի հետ։ Այս մասին սեպտեմբերի 20-ին՝ Հայաստան–Սփյուռք համաժողովի ժամանակ, ասել է ՀՀ փոխվարչապետ Վաչե Գաբրիելյանը։
Նրա խոսքով՝ քննարկվել են հայ ինժեներների, բժիշկների, գիտնականների եւ իրավաբանների կարողությունների զարգացման նոր ծրագրեր։ Պրոֆեսիոնալ ներուժը պետք է օգտագործել բոլոր հնարավոր ճյուղերում, կարծում է նա։
«Համաժողովին գնահատվել է նաեւ զբոսաշրջության ոլորտում համատեղ աշխատանքի կարեւորությունը հայ ժողովրդի պատմամշակութային ժառանգության պահպանման համար։ Հայաստանը ամրապնդում է միջմշակութային երկխոսությունը եւ նպաստում է զբոսաշրջության հոսքին։ 2016 թվականին Հայաստան է այցելել 1 մլն 260 հազար զբոսաշրջիկ, ինչը 6 տոկոսով ավելի շատ է, քան 2015–ին, իսկ 10 տարի առաջ այդ թիվը 382 հազար էր»,– ասել է Գաբրիելյանը։