Հարավկորեական ռազմաարդյունաբերական ընկերության (KAI) փոխնախագահին իր բնակարանում մահացած են գտել, նա, ենթադրաբար, ինքնասպան է եղել, հայտնում է YTN-ն:

Հեռուստաալիքի տեղեկություններով՝ Կիմ Ին Սիկը, որը ՌՕՈւ-ի նախկին գեներալ էր եւ պատասխանատու էր արտասահմանում KAI  ընկերության բիզնեսի համար, մահվանից առաջ 3-էջանոց նամակ է թողել: Նամակում նա ներողություն է խնդրում, որ չի կարողացել կարգավորել ընկերության խնդիրները, չնայած իր մեծ ձգտմանը:

KAI ընկերությունն ամռանը ներքաշվել էր սպառազինության մշակումների հետ կապված կոռուպցիոն խոշոր սկանդալի մեջ: Սակայն Կիմ Ին Սիկը չի եղել դատախազության ուշադրության կենտրոնում:

Ավելի վաղ հաղորդվել էր, որ KAI նախկին նախագահ Հա Սոն Յոնը, որը հրաժարական էր տվել այս տարվա հուլիսին, կասկածվում էր ստվերային հիմնադրամ ստեղծելու մեջ, որի դարամական միջոցները ծախսվել են երկրի նախկին նախագահ Պակ Կըն Հեի օգնականներին կաշառելու համար: