ԱՄԷ-ում ոստիկանությունը ձերբակալել է Մեծ Բրիտանիայի քաղաքացուն, որն անպարկեշտ նշան է ցույց տվել վարորդին ճանապարհային վեճի ժամանակ։ Հիմա նրան սպառնում է կես տարվա ազատազրկում։
23-ամյա Ջամիլ Ահմադը սեպտեմբերին Դուբայում էր հանգստանում իր կնոջ հետ։ Սեպտեմբերի 8-ին բրիտանացի Ահմադը ճանապարհին վեճի է բռնվել մեկ այլ վարորդի հետ։ Բարկության պահին Ջամիլը նրան միջնամատ է ցույց տվել։
Երկու օր անց Ահմադին կալանավորել են օդանավակայանում։ Նրա կինը ստիպված է եղել մենակ վերադառնալ Մեծ Բրիտանիա։
Ջամիլին տարել են Բուր-Դուբայ թաղամասի տխրահռչակ ոստիկանական բաժանմունք, որտեղ 2011-ին սպանվել էր մեկ այլ բրիտանացի զբոսաշրջիկ՝ 39-ամյա Լի Բրեդլի Բրաունը։ Հետո Ահմադին գրավի դիմաց ազատ են արձակել՝ երկիրը չլքելու պայմանով։
ԱՄԷ-ում միջնամատ ցույց տալը համարվում է հանցագործություն ու կարող է պատժվել վեց ամսվա ազատազրկմամբ։
