Ճապոնիայի իշխանությունները ծրագրել են երկրի արեւմտյան ափերին ամերիկյան հակահրթիռային պաշտպանության Aegis Ashore համալիրներ տեղակայել: Այս մասին հայտնում է Asahi պարբերականը՝ վկայակոչելով կառավարությունում աղբյուրներին:
Պարբերականի տեղեկություններով՝ Տոկիոն մտադիր է ՀՀՊ-ն տեղակայել ի պատասխան Փհենյանի միջուկային փորձարկումների: Աղբյուրների փոխանցմամբ՝ երկրի Պաշտպանության նախարարությունը ռազմական բյուջեն մեծացնելու մասին հարցում է կատարել կառավարությանը. այսպիսի հակահրթիռային համալիրի արժեքը կարող է կազմել 714 մլն դոլար:
Ավելի վաղ Ճապոնիայում հակահրթիռային պաշտպանության շրջանակում Փհենյանի հերթական միջուկային փորձարկումների դեպքում հայտարարում էին լազերի օգտագործման մասին: Ենթադրվում է, որ հրթիռին հարվածն օդանավերից կամ նավերից կիրականացվի արձակումից անմիջապես հետո՝ այն ոչնչացնելու կամ վնասազերծելու համար:
