Ես հույս ունեմ, որ Հայաստանը կստորագրի ԵՄ-ի հետ նոր համաձայնագիրը, որովհետեւ այդ մասին նախորդ շաբաթ ՄԱԿ-ի գլխավոր ասամբելայում հայտարարեց ՀՀ նախագահ Սերժ Սարգսյանը. հույս ունեմ, որ դրանից հետո նահանջելու տեղ չունենք: Այս մասին, այսօր՝ սեպտեմբերի 25-ին, լրագրողների հետ հանդիպման ժամանակ նշել է Գլոբալիզացիայի եւ տարածաշրջանային համագործակցության վերլուծական կենտրոնի ղեկավար Ստեփան Գրիգորյանը:
Դիտարկմանը, թե արդյոք այս անգամ եւս Ռուսաստանի պահանջով Հայաստանը ստիպված չի լինի հրաժարվել ԵՄ-ի հետ նոր համաձայնագրի ստորագրումից, Ստեփան Գրիգորյանն ասաց. «Ես պարզապես չեմ հավատում, որ չենք ստորագրի այդ համաձայնագիրը մի պատճառով, քանի որ ՀՀ իշխանությունները բոլոր հնարավոր ու անհնար հարթակներից հայտարարում են, որ ստորագրելու են: Մենք նաեւ պետք է հասկանանք, որ սա ասոցացման պայմանագիր չէ, բայց կարեւոր է ունենալ ԵՄ-ի հետ համագործակցելու իրավական հիմքեր, քանի որ ԵՄ-ն եւ ԱՄՆ-ը միակն են, որ ուղղակիորեն աջակցում են Հայաստանին՝ ի տարբերություն մեր մյուս գործընկերների»,-ընդգծեց Ստեփան Գրիգորյանը:
Նշենք, որ ԵՄ-Հայաստան նոր համաձայնագրի ստորագրումը նախատեսված է այս տարվա նոյեմբերին: