«Սիփան» ոչ ոգելից ըմպելիքների գործարանում այսօր՝ սեպտեմբերի 25-ին տեղի ունեցած պայթյունի հետեւանքով փլուզում է տեղի ունեցել: Այս մասին NEWS.am-ին հայտնեցին Արտակարգ իրավիճակների նախարարության լրատվական ծառայությունից:
Նրանց փոխանցմամբ, գործարանի կաթսայատանը (մոտ 80 քմ) տեղի է ունեցել պայթյուն. փլուզվել է կաթսայատան արտաքին պատը (մոտ 24 քմ): Անցորդ 61-ամյա Գ. Բ.-ն եւ գործարանի աշխատակից 32-ամյա Ա. Ղ.-ն, ստանալով տարբել աստիճանի մարմնական վնասվածքներ, մինչ փրկարարների՝ կանչի վայր հասնելը հոսպիտալացվել են Աբովյանի ԲԿ, այնուհետեւ Ա. Ղ.-ն տեղափոխվել է Աստղիկ ԲԿ: Բժիշկները տուժածների առողջական վիճակը գնահատել են միջին ծանրության:
«Աբովյան» բժշկական կենտրոնից մեզ հայտնեցին, որ իրենց մոտ կար ընդամենը 1 տուժած, որն էլ ավելի ուշ Երեւան է տեղափոխվել: Մեր տեղեկություններով, Երեւան տեղափոխված տղամարդն ունեցել է ողնաշարի խնդիր:
Փրկարարներն իրականացրել են պատի թուլացած հատվածի ապամոնտաժում (մոտ 15 քմ):
Կատարվածի վերաբերյալ փորձեցինք պարզաբանում ստանալ նաեւ «Սիփան» գործարանից, սակայն մեր զանգերին այդպես էլ չպատասխանեցին:
