ՌԴ Քննչական կոմիտեն քննություն է կատարում Պաշտպանության նախարարության պատմության մեջ ռեկորդային կաշառքի վերաբերյալ քրեական գործով, հայտնում է «Կոմերսանտը»:
Պարբերականի տեղեկություններով՝ գործը հարուցվել է ՌԴ ՊՆ պարենի վարչության տեխապահովման բաժնի պետ, գնդապետ, 46-ամյա Ալեքսանդր Վակուլինի դեմ: Նա մեղադրվում է առանձնապես խոշոր չափով խարդախության եւ առանձնապես խոշոր չափով կաշառք ստանալու մեջ:
Հաղորդվում է, որ գնդապետը 368 մլն ռուբլի կաշառքի դիմաց նպաստել է Պաշտպանության նախարարության հետ խոհանոցների, փռերի, ցիստերնների եւ այլ հատուկ տեխնիկայի պայմանագրեր կնքելուն, որոնք իրականացնելիս խոշոր չափի յուրացումներ են կատարվել: Դրանից զատ, Վակուլինը ընդհանուր հովանավորչություն է խոստացել դրանց իրականցմանը մասնակցած առեւտրականներին:
Ռազմական դատարանը Վակուլինին մինչեւ հոկտեմբերի 29-ը կալանավորելու որոշում է կայացրել:
