Ոստիկանությունը շարունակում է ուժեղացված ծառայությունը Երեւան մտնող ճանապարհահատվածներում եւ մայրաքաղաքում։
Սեպտեմբերի 18–24–ին Երեւան քաղաքում իրականացված ծառայության ընթացքում, ճանապարհային ոստիկանության ծառայողների կողմից ճանապարհային ոստիկանության հատուկ պահպանվող տարածք է տեղափոխվել 131 տրանսպորտային միջոց, որից 2–ի խլացուցիչը առանց համապատասխան թույլտվության վերասարքավորված է եղել բարձր ձայնով երթեւեկելու համար։
Մեկի վրա տեղադրված է եղել գերհզոր հատուկ ձայնային ազդանշաններ արձակելու սարքավորում։ 52–ի վարորդները մեքենան վարել են ոչ սթափ վիճակում, իսկ 76 վարորդի նկատմամբ վարչական իրավախախտման վերաբերյալ արձանագրություն է կազմվել՝ համապատասխան փաստաթղթեր չունենալու եւ այլ խախտումների համար։
Նույն ժամանակահատվածում 36 վարորդի նկատմամբ վարչական իրավախախտման վերաբերյալ արձանագրություն է կազմվել հողմապակու լուսաթափանցելիության չափի խախտման, իսկ 3 վարորդի երթեւեկության ընթացքում տրանսպորտային միջոցից տարբեր իրեր եւ առարկաներ նետելու համար։
Սեպտեմբերի 18–ից 24–ն էլ մարզերում ուժեղացված ծառայություն է իրականացրել ճանապարհային ոստիկանության ճանապարհապարեկային ծառայության 2–րդ սպայական գումարտակի ծառայողները։ Նրանք ճանապարհային ոստիկանության հատուկ պահպանվող տարածք են տեղափոխել 103 տրանսպորտային միջոց, որից 92–ի վարորդները մեքենան վարել են ոչ սթափ վիճակում։ 100 վարորդի նկատմամբ վարչական իրավախախտման վերաբերյալ արձանագրություն է կազմվել ՝ մեքենան թաղանթապատված հողմապակիով վարելու, իսկ 13 վարորդի ժամկետնանց ԱՊՊԱ պայմանագրով երթեւեկելու համար։