Պետք չէ աշխատանքի եւ անձնական կյանքի համար միեւնույն գաղտնաբառը դնել։ Այս մասին սեպտեմբերի 27–ին՝ լրագրողների հետ ունեցած հանդիպման ժամանակ, հայտնել է «Microsoft»– ի Կենտրոնական, Արեւելյան Եվրոպայի եւ ԱՊՀ երկրների ծրագրային անվտանգության ղեկավար Արտյոմ Սինիցինը՝ Երեւանում կայացած «ArmTech» տեխնոլոգիական կոնֆերանսի շրջանակներում։
Նրա խոսքով, համացանցի հիգիենան տարածաշրջանում դեռեւս բարձր չէ։ Ամենատարածված սխալներից մեկը կորպորատիվ համակարգերի եւ սոցիալական կայքերի համար միեւնույն գաղտնաբառի տեղադրումն է։ Համացանցում գաղտնաբառերի 82 տոկոսի գողությունները կապված են հենց դրա հետ։ Բացահայտելով օգտատիրոջ գաղտնաբառը սոցիալական կայքերում՝ դրանցով կարելի է մտնել նրա կորպորատիվ փոստ, եւ հաճախ դռները բացվում են։
«Մնում է եւս մեկ անգամ կոչ անել՝ մի՛ օգտագործեք միեւնույն գաղտնաբառը աշխատանքում եւ դրանից դուրս։ Իսկ սոցիալական կայքերը՝ եւ՛ ռուսական, եւ՛ միջազգային, թույլ են տալիս լրացուցիչ ստուգել գաղտնաբառերը հավելվածների կոդերի կամ SMS-ի միջոցով»,–եզրափակեց Սինիցինը։