Վերջին 10 տարիների ընթացքում Արցախում 3,8 անգամ ավելացել է էլեկտրաէներգիայի արտադրության ծավալը, որը դեռ ավելանալու է, որովհետեւ փոքր հէկ-էրի շինարարությունը դեռ շարունակվում է: Այս մասին, այսօր՝ սեպտեմբերի 28-ին, լրագրողների հետ հանդիպման ժամանակ նշել է Արցախի պետնախարար Արայիկ Հարությունյանը:
Նրա խոսքով, նույնկերպ ավելացել է էլեկտրաէներգիայի սպառումը, ինչը խոսում է տնտեսական աճի ու զարգացման մասին. «Եթե 2007-ին էլեկտրաէներգիայի սպառումը կազմել է 225 մլն կվտ/ժամ, ապա 2017-ին՝ 352 մլն կվտ/ժամ: Սպառման ավելացում նշանակում է բարեկեցություն: Սկսել ենք էլէներգիա արտահանել Հայաստան եւ այդ թիվը եւս տարեցտարի բազմապատկվելու է»,-ասաց նա:
Արայիկ Հարությունյանը նշեց, որ եթե 2007 թվականին արդյունաբերական արտադրանքի ծավալը կազմել է 22,7 մլրդ դրամ, ապա 2017-ին այն անցնելու է 70 մլրդ դրամից: Նշված ժամանակահատվածում համախառն արտադրանքն ավելացել է 2,9 անգամ:
«Եթե 2007-ին շինարարության ծավալն Արցախում 20,8 մլրդ դոլար էր կազմում, ապա 2016-ին այն կազմել է 46 մլրդ դրամ: Մենք ունենք զարգացող ենթակառուցվածքներ բոլոր ոլորտներում՝ կապ, տրանսպորտ, էներգետիկա, խմելու ջուր, ոռոգման համակարգ եւ այլն: Այս տարիներին կառուցվել է Վարդենիս-Մարտակերտ ճանապարհը, որը ոչ միայն անվտանգ է, այլեւ հարմարավետ»,-ընդգծեց պետնախարարը: