Հայաստանի Հանրապետության տնտեսական զարգացման եւ ներդրումների նախարար Սուրեն Կարայանը եւ Եգիպտոսի Արաբական Հանրապետության ներդրումների եւ միջազգային համագործակցության նախարար Սահար Նասրն այսօր փոխըմբռման հուշագիր են ստորագրել ներդրումների ոլորտում համագործակցության վերաբերյալ:
Նախարարությունից NEWS.am-ին հայտնում են, որ երկու նախարարների առաձնազրույցի ընթացքում կողմերն ընդգծել են հուշագրի կարեւորությունը եւ նշել, որ անհրաժեշտ է ճիշտ եւ թիրախային քայլեր ձեռնարկել այն կյանքի կոչելու համար: «Մենք առաջին անիվը կպտտենք առաջ շարժվելու համար»,-նշել է Եգիպտոսի Արաբական Հանրապետության ներդրումների եւ միջազգային համագործակցության նախարար Սահար Նասրը:
Նախարար Կարայանն առաջարկել է համատեղ ներդրումային ծրագրեր մշակել՝ համադրելով երկու երկրների առավելությունները եւ արտոնյալ շուկաները:
Հանդիպման ընթացքում կարեւորվել է Եգիպտոսի եւ Հայաստանի ազատ տնտեսական գոտիների միջեւ համագործակցությունը: Մասնավորապես եգիպտական պատվիրակության կազմում գտնվող Սուեզի ազատ տնտեսական գոտու պատասխանատուների հետ առավել մանրամասն կքննարկվի համագործակցության հեռանկարը:
Նախարար Կարայանի խոսքով՝ կարիք կա օժանդակելու երկու երկրների գործարարների համագործակցությանը հատկապես գյուղատնտեսության ոլորտում, որն էլ կհանգեցնի առեւտրաշրջանառության ծավալների աճին: Սահար Նասրն առաջարկել է պարբերական փոխայցելություններ կազմակերպել գործարար շրջանակների միջեւ:
Կողմերն անդրադարձել են նաեւ լոգիստիկ ընկերությունների միջեւ փոխգործակցությանը:
Երկու նախարարները վերահաստատել են պատրաստակամությունը՝ մշտական կապի եւ երկխոսության միջոցով խթանելու Հայաստանի եւ Եգիպտոսի միջեւ տնտեսական փոխգործակցությունը:
Հայաստանի Հանրապետության տնտեսական զարգացման եւ ներդրումների նախարար Սուրեն Կարայանը եւ Եգիպտոսի Արաբական Հանրապետության ներդրումների եւ միջազգային համագործակցության նախարար Սահար Նասրնը ելույթներով ողջունել են հայ-եգիպտական գործարար համաժողովի մասնակիցներին: