Հայաստանի իշխանությունները Եվրասիական միության շրջանակում տապալել են ե՛ւ տնտեսությունը, ե՛ւ անվտանգությունը: Հոկտեմբերի 3-ին ԱԺ-ում այս մասին ասաց «Ելք» դաշինքի խմբակցության ղեկավար Նիկոլ Փաշինյանը՝ ներկայացնելով Եվրասիական միությունից Հայաստանի դուրս գալու հայտարարության նախագիծը: «Ելքն» առաջարկում է այս նպատակով խորհրդարանական ժամանակավոր հանձնաժողով ստեղծել եւ քննարկել ԵՏՄ-ին Հայաստանի անդամակցության դրական եւ բացասական կողմերը:
Արեւմտամետ ընդդիմադրի խոսքով՝ 2016 թվականի ապրիլյան իրադարձությունների ժամանակ Հայաստանի իշխանություններն ասում էին, որ ԵՏՄ-ն անվտանգությանը չի առնչվում, սա զուտ տնտեսական միավորում է: «Իսկ երբ հարցնում էինք՝ ԵՏՄ անդամ երկիրն ինչու այնպիսի տնտեսություն ունի, որ ստիպված է պատերազմել 80-ական թվականների զենքով, մեզ պատասխանում էին՝ բաներ կան, որոնց մասին չի կարելի բարձրաձայն խոսել: Իսկ եթե չի կարելի, ապա եկեք հավաքվենք ժամանակավոր հանձնաժողովի ձեւաչափով եւ այս հարցը քննարկենք, թեկուզ եւ փակ դռների ետեւում»,- ասաց Փաշինյանը: