Ցանկացած ընկերություն Հայաստանում կարող է բեռնափոխադրում իրականացնել: Այս մասին այսօր՝ հոկտեմբերի 4-ին, լրագրողների հետ հանդիպման ժամանակ նշել է ՊԵԿ նախագահ Վարդան Հարությունյանը՝ անդրադառնալով նրան, որ նախկին կարգոների փոխարեն ստեղծվել է նոր ընկերություն եւ մտավախություն կա, որ այդկերպ մոնոպոլացնում են ոլորտը:
«Ցանկացած տնտեսվարող, ով ուզում է ապրանք ներկրել երկիր, ձեռքերը ազատ է, կարող է ինքը ցանկացած բեռնափոխադրողի հետ կազմել պայմանագիր կամ անձամբ այդ գործունեությունն իրականացնել, դաշտը բաց է»,-ասաց նա:
ՊԵԿ նախագահի խոսքով, այդ նոր ընկերությունները պարզապես համակարգում է բեռնափոխադրումների եւ մանր առեւտրով զբաղվողների գործառույթները, որպեսզի կարողանա այն մասը, որն ապահովված չէ համապատասխան փաստաթղթավորմամբ, փաստաթղթավորել եւ այդ տնտեսվարողներին հնարավորություն տալ 5 տոկոսի փոխարեն վճարել 1,5 տոկոս շրջանառության հարկ:
Դիտարկմանը, որ կարգոներով զբաղվող նոր ընկերությունն արդյոք մոնոպոլ դիրք չի՞ զբաղեցնում, եւ ճի՞շտ են այն տեղեկությունները, որ այդ ընկերությունը ղեկավարում է «Գազպրոմ Արմենիա»-ի նախկին աշխատակիցը, Վարդան Հարությունյանը պատասխանեց. «Ընկերության տնօրենը, այո՛, «Գազպրոմ Արմենիա»-ի նախկին գլխավոր հաշվապահն է, որն ունի մեծ փորձ եւ պատրաստակամություն է հայտնել այդ ընկերությունում աշխատելու, ինչի՞ չաշխատի, ընդամենն այն բանի համար, որ ինձ հետ աշխատել է նույն ընկերությունո՞ւմ, անհիմն է դա: Այդ նույն հիմնավորմամբ մենք հիմա ոչ մեկի հետ չաշխատե՞նք»:
