Հայաստանի ԵՏՄ-ից դուրս գալու վերաբերյալ նախագիծը դեռ ԱԺ օրակարգում է: Այս մասին այսօր՝ հոկտեմբերի 4-ին, Ազգային ժողովում ասել է Ելք դաշինքի պատգամավոր Արամ Սարգսյանը:
«Հայաստանի ԵՏՄ-ից դուրս գալու նախագիծը քննարկվելու է հանձնաժողովներում: Մենք ունենք հնարավորություն լսումներ կազմակերպելու, որոնք կլինեն թե խմբակցություններում, թե առանձին շահագրգիռ մարմինների հետ: Վերջիվերջո մենք ունենք նաեւ արտաքին գործերի հանձնաժողովում Էդմոն Մարուքյանի ելույթը, որը տակտիկական նպատակով հետաձգեցինք, որ կարողանանք այդ ժամկետը երկարաձգել: Երկու ամսվա ընթացքում կարող ենք դա քննարկել: Հանձնաժողովում հարցը կա, այն օրակարգում է, որեւէ մեկը չի կարող օրակարգից հանել: Նպատակահարմարույթունից ելնելով դա նորից կընդգրկվի ԱԺ օրակարգ»,-ասել է Արամ Սարգսյանը:
Պատգամավորը նշել է, որ լիագումար նիստից դուրս էլ կազմակերպվելու են լսումներ. «Շատ ավելի լուրջ քննարկման խնդիր կա, ՀՀԿ-ականները թվեր էին ներկայացնում, որոնք խոցելի թվեր են, որին կանդրադառնանք էդ ժամանակ»,-ասել է պատգամավորը:
