Ազգային ժողովը մերժեց ԵՏՄ-ից Հայաստանի դուրս գալու հարցով խորհրդարանական ժամանակավոր հանձնաժողով ստեղծելու մասին «Ելք» խմբակցության առաջարկը: Նախագծին կողմ է քվեարկել 105 պատգամավորներից 10-ը, դեմ՝ 79-ը: «Ելք»-ի 9 պատգամավորներից դահլիճում ներկա էր 7-ը: Նրանցից բացի՝ խմբակցության նախագծին կողմ են քվեարկել «Ծառուկյան» խմբակցությունից Գեւորգ Պետրոսյանն ու ՀՅԴ-ից Ռոմիկ Մանուկյանը, ինչպես նաեւ ԵՏՄ-ին Հայաստանի անդամակցության կողմնակից Արտաշես Գեղամյանը: Հետո, սակայն, Գեղամյանն ասել է, որ սխալմունք է եղել:
Այս հարցը ներառվել էր նաեւ արտաքին հարաբերությունների խորհրդարանական մշտական հանձնաժողովի՝ անցյալ շաբաթվա նիստի օրակարգում: Ժամանակավոր հանձնաժողով ստեղծելու առաջարկն այստեղ մերժվեց, իսկ ԵՏՄ-ից դուրս գալու հարցն ընդհանրապես չքննարկվեց. հիմնական զեկուցող Էդմոն Մարուքյանը չէր ներկայացել նիստին:
Որո՞նք են լինելու «Ելք»-ի հետագա քայլերը: Արամ Սարգսյանի խոսքով՝ ԵՏՄ-ից Հայաստանի դուրս գալու նախագիծը կշարունակեն քննարկել հանձնաժողովներում, հնարավոր է՝ նաեւ լսումներ կազմակերպեն խմբակցություններում եւ առանձին շահագրգիռ մարմինների հետ:
Մինչ այդ, վերլուծաբաններն այս հարցը բարձրացնելն ու քվեարկության արդյունքը համարում են Հայաստանի նվաստացման եւ ԵՏՄ-ին մեր երկրի անդամակցության վերահաստատման արտահերթ ցուցադրություն: Նշում են նաեւ, որ սա Հայաստանի ղեկավարությանը հնարավորություն է տալիս Եվրամիության հետ կնքվելիք նոր համաձայնագրին ընդառաջ եւս մեկ անգամ հավատարմությունը ցուցադրել Ռուսաստանին: