Ադրբեջանը նույնպես կարող է ԵՏՄ անդամ դառնալ։ Այս մասին հոկտեմբերի 10-ին լրագրողներին ասել է «Մոդուս Վիվենդի» վերլուծական կենտրոնի ղեկավար Արա Պապյանը։
ԵՏՄ–ին Ադրբեջանի անդամակցությունը, նրա խոսքով, շատ բացասական զարգացում կունենա Հայաստանի համար։ «Դա նշանակում է, որ Հայաստանի վրա գործադրվող ճնշումը մեծանում է։ Ես Սերժ Սարգսյանի եւ Իլհամ Ալիեւի առաջիկա հանդիպումից, որն ամենայն հավանականությամբ տեղի կունենա, ինչ–որ լուրջ փոփոխություններ չեմ սպասում»,– ասել է Պապյանը՝ հավելելով, որ Բաքվի դիրքորոշումը Ղարաբաղի հարցում ավանդական կոշտ է եղել, իսկ հիմա ավելի է կոշտացել։
Փորձագետի կարծիքով հարցն այն է, թե որքան երկար Հայաստանը կկարողանա դիմադրել դրան, ընդ որում, Երեւանի կողմից զիջումների դեպքում հայկական կողմը ավելի ծանր վիճակում կհայտնվի։ «Այս մասին խոսում են անգամ ռուսաստանցի փորձագետները։ Ցանկացած տարածքային զիջում հայկական կողմից կբերի ոչ թե խաղաղության, այլ պատերազմի»,– ասել է Պապյանը։
Ընդ որում, փորձագետը կարծում է, որ Եվրոպան շահագրգռված չէ, որ ղարաբաղյան հարցը լուծվի բացառապես ռուսական կողմից, եւ ուզում են մասնակցություն ունենալ։ Արա Պապյանը վստահ է, որ դա լավ հնարավորություն է Հայաստանի համար Լեռնային Ղարաբաղի շուրջ իր դիրքորոշումն առաջ մղելու համար։
