2018–ի պետբյուջեի հարցը մեծ հետաքրքրություն ու ոգեւորություն է առաջացրել շատերի մոտ։ Հոկտեմբերի 12-ին՝ լրագրողների հետ հանդիպման ժամանակ, նման կարծիք է հայտնել Ինովացիոն եւ ինստիտուցիոնալ հետազոտությունների կենտրոնի ղեկավար, տնտեսական գիտությունների թեկնածու, դոցենտ Ատոմ Մարգարյանը:
Նրա խոսքով՝ 2018–ի բյուջեի նախագիծը բավականին իրատեսական է, սակայն ակնկալվում է եկամուտների շատ ագրեսիվ քաղաքականություն: «Մասնավորապես, հարկային ոլորտի եկամուտների շրջանում: Եվ ամենայն հավանականությամբ, կառավարությունը կշարունակի նույն տնտեսական քաղաքականությունը, որն իրականացվել է այս տարի»,-պարզաբանել է Մարգարյանը: Միեւնույն ժամանակ, խոսելով 2018 –ի բյուջեի նախագծով նախատեսված ծախսերի մասին, փորձագետը դրանք անվանել է բավականին պահպանողական` սոցիալական կարիքների ծախսերի եւ տնտեսական աճի ապահովման տեսանկյունից: Ընդհանուր առմամբ, տնտեսագետը գտնում է, որ 2018–ի բյուջեի նախագծով նախատեսված ծախսերը հիմնականում ուղղված կլինեն կայունության ապահովմանը: