Պետություններում ստեղծվող արդյունքը՝ ՀՆԱ-ն, պետք է  արդարացի բաշխվի, իսկ ինչպես է բաշխված՝ մենք չգիտենք: Այս մասին, այսօր՝ հոկտեմբերի 13-ին, ԵԽԽՎ-ի աշնանային նստաշրջանի լիագումար նիստում իր ելույթում նշել է հայկական պատվիրակության ներկայացուցիչ, ՀՀ ԱԺ նախագահի տեղակալ Միքայել Մելքումյանը:

Նա իր ելույթում կարեւորել է այն, որ ժողովրդավարական դասական ինստիտուտները ներկա կոշտ մարտահրավերների պայմաններում՝ աղքատության, գործազրկության  եւ սոցիալական այլ խնդիրների ահագնացող մակարդակի դեպքում, չեն լուծում կամ լիովին չեն լուծում խնդիրները:

«Որն է լուծումը: Լուծումներից մեկն այն է, որ պետք է քննարկել նորարարական բաղադրիչ պարունակող ժողովրդավարական ինստիտուտի ձեւավորման հարցը. տնտեսության ազատականացման եւ պետական միջամտության օպտիմալ համադրում, տնտեսական աճի սոցիալական բաղադրիչի բարձրացում, տնտեսական աճի վերածում տնտեսական զարգացմանը:

Մենք ունենք սոցիալական բեւեռացման Ջինիի բարձր գործակից: Իհարկե,  եթե մենք ունենք ինչպես այժմ է 2-3% աճ, ապա, մենք  պետք է ապահովենք 6-7% աճ: Սակայն աճի որակը պետք է փոխվի: Առավել մեծ եկամուտ ունեցողները պետք է ավելի շատ հարկեր վճարեն, որպեսզի կենսամակարդակի ժառանգականությունը չմոնոպոլացնեն:

Այսպիսով՝ պետություններում ստեղծվող արդյունքը՝ ՀՆԱ-ն, պետք է  արդարացի բաշխվի, իսկ ինչպես է բաշխված՝ մենք չգիտենք: Այդ հարցի լուծման  պայմաններից միայն մեկը  տնտեսության եւ հանրային կյանքի համատարած թվայնացումն է»,-ասել է նա: